Mobilidade eficiente
O transporte é o sector que máis enerxía consume en España, alcanzando un 40 % do total nacional. Soamente os turismos representan o 18 % do consumo enerxético total do noso país. E do parque total de automóbiles, tan só algo máis do 5 % se nutre de fontes renovables.
Nas cidades, a mobilidade caracterízase pola dependencia do coche, que consume moito espazo e enerxía e ten importantes deficiencias en tres ámbitos: o económico (un alto custe do transporte), o social (xera exclusión social e territorial) e o medio ambiental (afecta á calidade do aire e á saúde das persoas). Se a isto lle engadimos a conxestión do tráfico, tradúcese en máis tempo perdido en desprazamentos, máis enerxía desperdiciada e un aumento do estrés, o cansazo e a irritabilidade.
É necesario fomentar un uso máis racional do coche, reducir a necesidade de desprazamentos e incentivar o uso de modos de transporte máis eficientes. Estes son, por orde, o desprazamento a pé, na bicicleta ou o patinete, o transporte público e, en último lugar, a moto e o coche privado.
Son tres os piares fundamentais da transición enerxética cara a un transporte máis eficiente e sostible:
- Unha mobilidade urbana con menos dependencia do coche, que reduza o consumo de combustibles fósiles e o impacto medioambiental e recupere os espazos para o cidadán.
- A progresiva electrificación dos vehículos: bicicletas, patinetes, motocicletas e coches eléctricos, enchufables e de pila de combustible.
- A condución eficiente. Se non queda máis remedio que usar o coche, polo menos facelo sen malgastar combustible.
Que é a mobilidade?
A mobilidade eficiente e sostible é o desprazamento de persoas e mercancías de forma eficiente (é dicir, logrando os mesmos resultados cos mínimos recursos posibles) e sostible (que se pode manter durante un longo tempo sen esgotar os recursos e sen causar graves danos ao medio ambiente). A mobilidade urbana fai referencia aos movementos que se producen na cidade.
Mobilidade urbana
Sabías que…
Estímase que camiñar 25 minutos ao día suman sete anos máis de vida. E que andar en bicicleta 8 quilómetros para ir ao traballo catro días á semana evita 750 kg de emisións de CO2 anuais.
Preto do 40% do consumo de enerxía final concéntrase no sector do transporte, focalizándose nos consumos asociados ao transporte por carreteira (35% do consumo de enerxía final).
Consellos prácticos para a mobilidade urbana
- Usa o transporte público ou comparte coche con veciños e compañeiros de traballo. Case sempre hai alternativas; Se podes, evita viaxar en coche.
- Para distancias curtas, é moito máis eficiente e saudable desprazarse a pé ou en vehículos sostibles.
- As rúas sen tráfico melloran as relacións sociais, potencian a interacción veciñal e benefician a economía.
- Limitar a velocidade a 30 km/h dentro da cidade calma o tráfico e reduce o risco de accidentes e atropelos.
- Restrinxir o acceso dos vehículos máis contaminantes ao centro das cidades é beneficioso para todos. Mellorar a calidade do aire é unha necesidade e unha obriga real.
Mobilidade eléctrica
Consellos prácticos de mobilidade eléctrica
- Aproveita as axudas directas (Plan MOVES III) para adquirir vehículos eléctricos e híbridos enchufables, así como para instalar puntos de recarga.
- Cada vez existen máis vehículos sostibles: coches, motos, bicicletas e patinetes eléctricos son boas alternativas para moverse pola cidade.
- Ademais, son medios de transporte silenciosos, libres de emisións, fiables e sinxelos de manter.
- Pensa no medio ambiente: a concienciación xerou un cambio cada vez máis a favor da mobilidade sostible nos cidadáns.
Sabías que…
Un automóbil eléctrico gasta moito menos que un convencional. O custo por km recorrido dun vehículo eléctrico é até seis veces menor que nun vehículo de gasolina ou diésel. As diferenzas do custo por km entre tecnoloxías varían se a recarga do vehículo eléctrico se realiza no fogar ou é pública e o prezo das gasolinas e gasóleos, pero de maneira xeral, o custo do vehículo eléctrico está en torno a 1,5-2 €/100 km mentres que un vehículo de gasolina está en torno a 9-12 €/100 km.
Condución eficiente
Consellos prácticos para unha condución eficiente
- Apaga o motor en paradas que duren máis de 60 segundos (se o teu coche non o fai de xeito automático).
- Arrancar é fundamental para aforrar. Non deas aceleróns nin agardes a iniciar a marcha tras o arranque.
- Usa a 1.ª marcha só para comezar a moverte e cambia a 2.ª tras un par de segundos.
- As marchas longas son esenciais para aforrar carburante. Cambia canto antes e circula a poucas revolucións.
- Fai rapidamente os cambios de marcha. Evitarás perder velocidade e ter que volver a acelerar.
- Se conduces un coche de cambio automático con distintas opcións, escolle o modo económico.
- Mira a estrada o máis lonxe posible para anticipar freadas ou aceleracións.
- Mantén unha velocidade constante, evitando perdas de enerxía cinética e aproveitando ao máximo as inercias do vehículo.
- Para desacelerar, deixa rodar o coche coa marcha engrenada nese instante para despois frear. Se as condicións de condución o permiten, é mellor deter o coche sen reducir.
- Evita as aceleracións bruscas e as altas revolucións (procura non pasar de 2500 r.p.m. nun coche gasolina e 2000 nun diésel).
- Revisa a presión dos pneumáticos: se é moi baixa consumirás máis.
- No deixes instaladas bacas, porta equipaxes, cofres… Móntaos só cando os precises.
Coñece máis información sobre formas de mobilidade sostible nestas ligazóns:
